الصالحاني القدير سعيدعبد السلام في قلب الله

الصالحاني القدير سعيد عبد السلام ( سعود الحبيب ) … في قلب الله .
1941 – 2023

بقلم الياس الحاج
كم مرة قلت لك : حشرجة صوتك المتمازجة مع بحة حنونة تذكرني بالزكرت الراحل القدير يوسف شويري ( أبو سليم الحبيب ) ، وفي كل مرة تجيبني بذات العبارة … ما مطولة الحكاية لودع وصير لعنده …..
وأعرف سر إجابتك على خلفية شقاوة الأيام التي مررت بها والأقرب إلى شقاوة أيامه وطيبة قلبه وشهامته مع الجميع …..
في كل مرة كنت تغيب .. تنقطع فيها عن مشاركاتك الإذاعية والتلفزيونية ، كانت إجابتك لسؤالي .. ( وين غاطط سعود ؟! ) ضحكة أسى مصحوبة ببحة محشرجة ( رح يجي يوم غط وما أرجع …. ) …
وكم من مرة ألتقيك بحي الصالحية أو بمقهى الروضة أو في النقابة لتخبرني عن حالك وأحوالك وتعتير أيامك .. وسامحني رح أرجع اليوم لشي من القروشة اللي كانت تصير بيني وبينك ، واللي دايماً فاتحتها منك بعبارة :
– الله وكيلك .. وكيلك الله .. مالي حدا ..
– في حدا ماله حدا لك سعود ؟.
– أنا مالي غير الله وأنت أبو الميش .. وهالكام عبد الفقير من اللي بتفركش فيهن بنهاري .
– بيشرفك هالحكي ما قلته من كام يوم بغرفة المخرجين لأبو عامر ( رفيق سبيعي ) ونذير عقيل ، ومحمود الأغواني ( أبو فارس ) .
– ياللطيف .. شو جني بتطلع من تحت الأرض أنت .. شو عرفك ؟!.
– كنت واقف أنا وصلاح قصاص عم نحكي عند الباب ..
– سمعته عم يقلك رح تلاقيني بعد كام يوم عباب القصر العدلي إذا ما قبضونا شغلنا بمسلسلك .
– تاريك بتحكي وبتسمع برا .
– وهي أنت سمعتني كمان ..
– لأنك كنت جوا بغرفة نذير .
– بعرفك مدري جني مدري عفريت .. بتسمع دبيب النملة .
– وأنت الصادق صوتك جاروشة وعالي وما في حديث بتقوله بغرفة ولا بآخر اتلكاريدور وما بينسمع للكل .
– أي وشو سمعت عن لساني كمان ؟
– أنك من 77 بالنقابة وشغلك نتاتيف ..
– بتقدر أنت وغيرك تقول غير هيك ؟!..
– فيك البركة .. بتستاهل كل خير ..
– وشو سمعتني عم قول كمان ؟
– إنو والدك الله يرحمه ما بتعرفه على خارطة الحياة لأنك فقدته وأنت أبن الخمس سنين .
– مظبوط .. هالحكي كان أيام الاستعمار الفرنسي.
– وبالضبط بالخمسوأربعين .
– يالطيف شو أنك صح .. ليش أنا قلت هيك معلومة ؟
– وقلت أنو اللي ربتك عمتك ..
– عمتي عفاف .. صح .. معقول سمعت كل هدول ؟.
– وإنك لازم تشتغل بكل عمل درامي بيحكي عن فرنسا ..
– حقي ..
– وأنو من حقك تشتغل بالقيشاني ..
– القيشاني .. القرماني .. ما بيجيبها غير ربك .. لهيك مو كتير داير عليها .. بإيدي مية صنعة أكل منها رزقتي .
– مية مية سعود .. ولا بتدوس عالمية وعسشرين..
– قد ما بدك أبو الميش .. عد على أصابع أيديك التنتين لقلك .. اشتغلت مشخصاتي بالمسرح الحر .. ومع نزار فؤاد .. وسعد الدين بقدونس .. ومع محمود جبر … وطلحت حمدي … والمسرح العسكري .. والمسرح القومي … وفرق مسرح خاصة على قفى مين يشيل ..
– شوي تاني بتطلع اشتغلت بس مسرح ومن أيام أبو خليل القباني .
– أي لأ .. مطقطق إذاعة وتلفزيون كتير ..
– وسينما .. بعرف شاغل كذا فيلم .
– يمر ملوحاً …. بدك تقول ما لي كتير نصيب بالسيلما …. المعنى اشتغلت ممثل عند الحاجة والطلب .
– وقدير .. أستاذ بشغلتك سعود .. الخلاصة إنك ممثل على عين والراس .. الكل بيعرف هي المعلومة .. غيره ؟!.
– يظهر ما بتعرف إني اشتغلت بأوتيلات المرجة والصالحية شي موظف استقبال .. وشي مشرف .. وشي مناوبات وأسهر للصبح عالخدمة ..
– الصراحة منك عرفت …
– واشتغلت يا سيدو على قولة أبو رشدو ( القاص الشعبي حكمت محسن ).. صبي فران .. وقهواتي .. ومخللاتي .. وبياع بليلة بالصالحية .. وبتجارة البزورية …
– كمان ما بعرف .. الشغل شرف للبني آدم ..
– وغنيت .. لك أي عالمسارح وحفلات سهر ليوم الغني ..
– لا تقولها !!!!..
– قلتها وخلص ..
– طلاع منها سعود .. صوتك ولا بابور الكاز بأه شلون غنيت .. بعدين مين بيسمع جاروشة ؟!
– إذا ما مصدقني اسأل أبو عامر ( رفيق سبيعي ) ولا الخانم هدى شعراوي هدول أساتذة بالمغنى والطرب .. المعنى بيفهموا بالأصوات .
– يا سيدي ما رح أسال … وغنيت .
– وعملت متلك كاتب … وكاتب صحفي ..
– هي مقدورة عليها من واحد بلفهويتك ..
– واشتغلت عتال ..
– وهي مقدور عليها على حدا من نمرتك ..
– ومكيس حمام .. وصباب قهوة .. وحلاق ..
– ولهيك بالصدفة لتحلق دقنك ؟
– كسل ..
– قولتك باب النجار مخلوع .. غيره سعود ؟
– وخياط نسواني ورجالي .
– وطبعاً ما بتعرف تضم الإبرة ..
– بعرف وحياة أبو الميش وعلى أصولها .. وبسرج .. وبدرز ..
– أي بس وبلا مستحى منك سعود . مسبع الكارات قليل البارات !! ..
– الحاجة مرة يا صاحبي .. لكان من وين جاب أبو شادي ( محمود جبر ) مسبع الكارات .
– منك ؟! .
– وأنت الصادق من أمثالي …
– على عيني ..
– يا حبة عيني اللي أمثالي لقمتهن مغمسة بالدم …………… وخبرتهن طعمها مر ………. ولهيك بتلاقيني بين الهلة والهلة بغطلي فترة لأني بكون فلست وأنا ناطر حدا يردلي خبر على شقفة دور بالإذاعة أو كام مشهد بالتلفزيون …. ولا من إيدي عم كون على قولة ( ……………. النقالة مو شغالة ) … وبرجع ع الإذاعة عم لولح … بتعرف ليش؟!.
– عجزت !!…
– لأني بكون منفض جيوبي .. مفلس عالآخر .. وبخاف أجي وما أعرف أرجع عقدسيا ,… ومشوار قدسيا بعيد مشي علي … وما بحب قول لحدا من صحابنا خدني بطريقك.
– كبير سعود .. بس الكبرى لله ..
– الله وكيلك .. وكيلك الله بخاف يجي يومي وما يلتقى حدا يا خدني بطريقه.
– قول الله سعود .. الناس لبعضها .. ولو خليت خربت .

وجاء اليوم الموعود … المكتوب .. وعلمت عن طريق ( الفيس بوك ) بأنك سوف تغط هذه المرة إلى الأبد … لكن طيبتك .. شهامتك .. لهفتك في استوديو الإذاعة .. غيرتك أيام التصوير .. شغفك للمسرح الذي أحببت .. نرفزتك المكبوتة .. عصبيتك المؤقتة … صفاء روحك .. محبتك واحترامك للجميع الذين بادلوك في سيرة حياتك الخصبة ذات الاحترام والطيبة ……..رهافتك وامتنانك بلطف ومودة شديدين – من دون مبرر – في كل مرة تشارك فيها ممثلاً في أعمالي الإذاعية والتلفزيونية …….. كل تلك العلامات والدلالات العميقة هي من سترافق بقاء اسمك فناناً قديراً في ذاكرة الفن السوري .
الله معك سعود …… لروحك الطيبة السلام ., ولذويك وشركاء الحياة والمهن والفن .. وكل من أحبك العزاء .
******************************
** سعيد عبد السلام .
** من أبرز أعماله المسرحية :
– بين ساعة وساعة .
– محطات ممنوعة .
– الأب .
– حبس الأحلام .
– النهب .
– ساعة حلوة.
– الفخ .
– المفتش العام .
***************************
** شارك في السينما :
– الرابعة بتوقيت الفردوس .
– رسائل في الهواء .
– زواج على الطريقة المحلية .
– ناجي العلي .
– حادثة النصف متر .
– عشاق .
*****************************
** في التلفزيون :
– الفصول الأربعة .
– صراع الزمن .
– عمر الخيام .
– خوخ ورمان .
– \سيرة آل الجلالة
– باب الحارة .
– بروكار .
– أبو زهدي وفكري .
– حارس القدس .
– على صفيح ساخن .
– حريم الشويش .
– فوضى .
– أيام لا تنسى .
– دنيا .
– الغربال .
– هي دنيتنا .
– وراء الشمس .
– أسأل روحك .
– زهرة البنفسج .
– وجه العدالة .
– أبو المفهومية .
– قمر شام .
– المفتاح .
– السراب .
– حرب السنوات الأربع .
– الوسيط .
– الغيوم البيضاء .
– مغامرة دليل والزيبق .
– الحب أولاً ,
– عرسان آخر زمن .
– الرحيل إلى الوجه الآخر .
– اليوم الطويل .
– ابتسامة على شفاه جافة .
– حمام القيشاني .
– المستجير .
– أبناء وأمهات .
– الفصول الأربعة .
– صراع الزمن .
– عمر الخيام .
– خوخ ورمان .
– \سيرة آل الجلالة .
– حي المزار .
– أمانة في أعناقكم .
– مزاد علني .
– عودة غوار .
– مقعد في الحديقة .
– العوسج .
– الحقيبة الضائعة .
– قانون الغاب .
– أبو البنات .
– أبو كامل .
– يوميات مرحة .
– دكان الدنيا .
– عريس الهنا .
– مرايا .
– الشطار .
– يوميات ظريفة .
– تلفزيون المرح .
– وداعاً ماركو .
– الشقيقتان .
– رحلة زمن .
– نهاية اللعبة .
– طرائف أبو دلامة .
– عائلتي .
– طرابيش .
– عسل الشوك .
وغيرها الكثير الكثير .
*****************************
** وفي الإذاعة :
– حكم العدالة .
– كلمتين وبس .
– ثنائيات .
– كلمه عالماشي .
– جزيرة المرح .
– الحب والعبقرية .
– شخصيات روائية .
– حامض .. حلو .. لفان .
– من يدفع الثمن .
– جزيرة الأسرار .
– حكايا الأطفال .
– كوكتيل أحلام .
– هيلا يا بحر .
– يوميات فهيم وفهمية .
– جيران البحر .
– زمن الحيتان .
– عيلة أبو وصفي.
– غرباء ..
وغيرها الكثير الكثير .