حاسب حسابي ما حسبت حسابك
غلطة حسابي درت ليها حساب
رسٌمت كتابي في سطور كتابك
وقت غيابي بأن وسط كتاب
الخايبة نحٌس في يوم شغابك
كيف كنا في الماضي أصحاب
ليك موٌدة و كنت فاتح بابك
دوم نشوف في الغلطة صواب
ويني في وقت الشدٌة أحبابك ؟؟
كنتي سند عند كل احباب
خاب الرجى فيك عليك عتابك
لاني من ناس تستاهل لعتاب
تفكٌر من نهار لاويت عذابك
معايا ما حملتي صبر عذاب
جيت نهدر بالخير في غيابك
ظهر لي اغتابك صادق كذٌاب
المظاهر تخدع و الڨلب دولابك
الدنيا وجوه و مكاتيب اسباب
لا تقول صاحبي يموت في ترابك
وقت شدٌة في الخيال سراب
تعيش عريس و يكثر ترحابك
تصبح وحيد كي تفرغ لجياب
لا من تفكر يقرع علي أبوابك
ينسو جميل خصالك و ثواب
حبٍيت نحكي شعور ينتابك
وقت تشوف خدعة لصحاب
كون ذيب و عيش مع ذيابك
كشر أنيابك كان كثرت كلاب
عارف غيابي كيف وقت غيايك
أنت وجودك في الحاضر غياب
ما نقول أبعد و جافي اصحابك
لصحاب كنوز و درٌ عند الذٌهاب
معاهم حياتك تحلى و أسبابك
ملح العشرة تذوڨ معاه شراب
لكن الشاعر حب يرٌد جوابك
عاطي دروس في الحياة كتاب
ياما جررٌب و ڨال عيد حسابك
الدنيا تعلم منها راسي شاب
خيار لصحاب وقت يكثر مصابك
تلڨى منابك واڨف عند الباب
نوصيك علي ناكر الخير اغتابك
قليل الاصل في لغياب إغتاب
البذرة تثمر بعد شور ترابك
هاذيك الصحبة و عشرة لصحاب
محمد رحال ✍️
