الكاتب جبارالقريشي يكتب في رثاء الشاعر العراقي الكبير مظفر النواب

في رثاء الشاعر العراقي الكبير
مظفر النواب، رحمه الله.

مشه النواب..
ومن بعده الشعر.. ظل بيت..
بس بلا سگف.. لا باب
جنحان الشعر طاحن..
وره ماطاح
واحد طاح..
من يوم المشه السياب
والآخر طاح أمس..
من دفنوا النَواب
….
مشه النواب..
الشعر من بعده ماصخ..
كل طعم ما بيه..
عين بلا جفن وأهداب
حُب.. من دون لهفة.. ولا زعل.. وعتاب
……
مشه النواب..
وعلى فراگة الوطن يبچي..
دم.. ودموع.. وعيونه تكت تراب
أمس بالليل..
الشباب تحزموا.. رفعوا تصاويره..
على الحيطان..
عالبيبان..
على كل نخله.. عد كل تيل
جيل يعزي جيل..
وليل.. يبچي الليل
………
مشه النواب.
واخذ طعم الشِعر وياه..
باهت.. لا طعم.. لا هيل
وحَمَد.. مصدوم.. ما مرنه..
ولا مرنه قطار الليل
وفراگينه.. صَحَت.. مفجوعة تلطم حيل.. تلطم حيل..
الهَدَل لليوم.. مادگم قميصه..
ولا لگاله زرار..
هَدَل ومتاني.. جيت الريل
ولا ليل البنفسج.. رگص رگص كحيل..
ولا دگ إگهوه.. ولا حرك الفنجان
وميزان الذهب.. وزع..
«حلاوة ليل..
محروگه حرگ روحي»
بچه وفزز صهيل الخيل
بچه النواب.
ون ونه.. بتوالي الليل
دگ دگة حزن
يسألنه.. عن ياس خضر؟
بعده يون؟
لو نسة طور الحزن؟
گلوله..
«حِن.. وآنه أحن»
حِن.. وآنه أحن؟.
……
جبار القريشي/العراق.