على بابك
رأفت عبد العال
وقفت الليلة على بابك
وجيت أبكى فى محرابك
مانا جيتلك عشان أتوضى من كفك
وأمسح دمعى فى أعتابك
على بابك أنا دقيت
وفى أحضانك همى رميت
وجيت أحكى لقيتنى بكيت
مانا برضه بعدت وجيت
حبيبتى ودنيتى وعمرى
ياشمسى إنتى وقمرى
أنا راجع عشان أغسل بقى همى
ومن جرحى أدينى شفيت
على بابك أنا دقيت
ولولا عيونك الكحلى ما كنت أنا جيت
لكنى عرفت طريقى وما ضليت
وفاكر إيدك الدافية
وفاكر ضحكتك صافية
وعارف إنى من بعدك مليش أحلام
ويمكن صوتى من بعدك ما يطلعش
ما عندى كلام أقولهولك .. ولا عذرى حكيتهولك
وياما بعدت لكن سحرك رسمته خريطة جوايا
عشان ماتوهش فى الزحمة
وياما زحام قابلنى بس ماقدرش
يغير رسم أوصافك … وذكرى زمان
مانا جيتلك عشان أتوضى من كفك
وأغمض عينى فى قربك وأريح جرحى وأنام
وقفت الليلة على بابك
وجيت أبكى فى محرابك
وأريح جرحى وأنام
وأريح جرحى وأنام
Discussion about this post