الشاعرة إيمان مصطفى تكتب حلاوة روح

حلاوة روح

إيمان مصطفى

قلبي اللي زرعته
جميع انواع الصبر خلاص
قام واتمرد
من بعد سنين
عاش فيها مسلم فكره احتار
ليه واتشرد
اخرتها اهي تشبه بدايتها
طب فين الأجر
وسنين عدت ولا عدتها
ملفوفة بصبر
وصلنا وجابت نهايتها
ولقينا اقدامنا بتحدفنا
لأبعد مشوار
موقفتش مرة وخدت قرار
وبودع ذكرى معرفتنيش،
ولا سمعت عني ولا قالولها
ان أنا إنسان
عشتها محروم
بلقب غلبان
كان نفسه،،،، يعيش
كان راضي بفرحة
ولو تنتيش
وشوية حب
كان نفسه يقب
واهوو فاض به الكيل
وفي أخر لقطة من المشهد
وبقلب نحيل
وجناح مكسور
بيفرفر…يعني (حلاوة روح)
متشعلقه نظره ف طرف النور
متعشم يمضي ف كشف حضور
ويعيش الدور بس للحظة
وعنده ملاحظة
هيقولها لكل الناس في الكون
الدنيا دي صطل معبي هموم
متعلق بيها وماسك أطراف
تلابيبها
لو يعني تحبك ياحبيبها
هتسيبها ف يوم
وهتبقى عليها وهيه ازاي
مش باقيه عليك
هتحبها جدا …. هتشقيك
راح تسرق عمرك…. وهتحنيك
وتفرح كل عوازلك فيك
تخرب عقلك
الله يخليك
يللا صحالها
واكشفها وبيّن ألاعيبها
سخرها عشانك وحسابها
وبعقلك تظبط عقاربها
هتجيك راضية
وتعمل حاوي
عشان ترضيك
تزرع افراح تطرح حواليك
أبواب الجنة
تنادي عليك
ل حياة نادية
مكسب بالكوم
صدق مكسور
كان نفسه يقوم
وفي أخر لحظة
من المشهد
اهو راح في النوم