بحر الغرام|خليفة الشبلي
شاعر ـ سلطنة عمان
يـا تفاصيـل الحيـاه ويـا احاسيس السعـاده
طمنوني كيف وضعي في الأمور العاطفيه
جاوبوني واحسموا أمـري وعدوها شهـاده
و أجبروه الخاطر اللي ما قبل بالنرجسيـه
صدق بإني من زمن ما بين عزمي والاراده
وبين حال ٍ ما يبي يعيد الليالي المخمليـه
حال يشكي من زمانه وكيف ما حقق مراده
وكيف كان وكيف صار يجـر وناتـه الخفيـه
رغم اني في فضاء الاشواق حققت الرياده
منطلق فارد جناحيني وعندي عزوم حيـه
لي طريق محددنه وقلب ما سهل اصطياده
ما عطيتـه حسـب مايبغي ولـو كان بيـديـه
كم سبـح بحـر الغرام ومـاسك زمـام القياده
والـعــواصـف داورتبـه وأعتبـرهـا مطلعيـه
مقتنـع بأن الطمــوح يكـون كلن وإجتهـاده
لكن اللـي يتعـب الانسان طيحـاتـه القـويـه
وآنا لي في منهج الوافين عنـوان وسيـاده
اتبــع الـصـالـح ولا لـي بالمصالـح أي نـيــه
غير ما يرضي ضميري بعد مضمون العباده
واختيـار الشـي عنـدي معتمـد ع المعنـويـه
كـم تعمـدت الغياب ولا معـي فيـه استفـاده
ليـن ما مل الغيـاب وضاقـت سنينـي عـليــه
وبعـد ذاك العمـر كلـه جيتلي بعلـم ومفـاده
جيت يدفعني الفضول ورغبه بقلبي عصيـه
اثـرت فينـي وشعـوري تـاه ما بيـن إرتــداده
والمشاعـر حاصرتني بصحبة لحون ٍ شجيـه
قلت برجع بس أسأل عن هوا قلبي وحصاده
وين صـار وكيـف وضعـه بالاجـابـه المنطقيـه
فإن عطوني الضوء الاخضر بعتمد بند الاجاده
وإن عـفــوني واعـذروني خيـره ومنـي التحيـه
