الحوار الوطني بقلم الدكتور محمد ضباشة

الحوار الوطني
محمد ضباشه

نفسى افرح يوم حِوَارِك
والقى صوت الفجر راضي
يتسمع ويشيل عَوَارِك
يترمى في جب ماضي
كان بياكل فى النهار
كان جراد يجرح خدودك
كان بيزرع فى البوار
نار بتحصد خير جدودك
كان معاه لغة الحوار
زى عتمة بعقل فاضي

نفسي تانى اشوف ولادك
طير يهفهف ع المدارس
والمعلم يبقى هيبه
مش بينفخ فى الهجايص
والكراسى تغور فى داهية
اللى عضت فينا حين
والسناتر تبقى ذكرى
والضمير بقى عنده دين
والأهالى بنور ولادهم
يبقوا فعلا مبسوطين
يومها أطبع فوق جبينك
قبلة تستاهل بلادي

نفسى اشوف لك عِمِّه طاهرة
ماهى مايلة بالفتاوى
أو خريطة دين وظاهرة
مش كلام اصلا مخاوي
جن شارب من عكاره
ع الشاشات ينشر بلاوي
يقتل الحب اللى بينا
يفسخ العقد اللى ناوي
نبقى أمة بجد صالحة
بالعمل مش بالحكاوي

نفسى مره أمشى فيكى
ألقى ضحكة من قلوبنا
تحضن الضى فى عينيكى
جنب رمشك نبنى طوبنا
يبقى واصل نهر نيلك
يبقى سلة خير حبوبنا
تبقى فعلا بنت ابوكي
حارسة حتى مال جيبونا
اللى سفه كل طامع
لما منه بعنا توبنا
ع الأماني والأغاني
واللى شايف انه عادي