معادن الناس
قصيدة ” معادن الناس ”
كاين ناس تحٍسهم ” طهرة “و” نضاف ”
يفاجولك هموم الڨلب و حزن أريافو
وقت شدة تصيبهم حذاك :” أولاف ”
كي غصن الاعراف في شجر أطرافو
رباية ناس أشراف و نسل أسلافْ
حفز عادات أعراف في عهد أعرافو
همة و أصل شرف من خيرة لوصاف
صافي كي جبح شهد يشّهى سخْافو
ثمة ناس أمهاف ناصبة المندافْ
أقراب غير أصحاب محضر اسيافْو
صربة ناس يهود في ثوب الأحلافْ
مظاهر البغض و الحسد غازي أشوافْو
رباية ” ملاڨيط ” ” كبابيل ” و آجلاف
لي تمدلو جنب يطعن بين أكـــتافو
نكّارين النعمة ، لا من حن و رافْ
بياعين العٍشرة في عناج شڨافو
يسقوك كاس شراب مر كي الصفصافْ
دفلة فات العلقم في مرار شفافو
جرالو كيف الثلب مجّبى على حوافْ
يلاوي في لدراك في حبال كتافو
عاجر يمشي يطيح على راس الكافْ
ريح زفيف زقلافو لا من شافو
قاطغ مسافات حتى تهدٍو أكتافْ
يعجز في الخطوات حاسد خلافو
نوصيك ما تخاوي العبد العكلافْ
الظالم يرجع عليه يصيبو مخطافو
دعوة المظلوم كي حجر المخطافْ
ما تدري عليها وقت تلٌوح خطافو
لا خير في العلج و الزميم الخوافْ
تبقى غير ” ڨهد ” في سراب طيافو
تعرف غير كلاب تسمن كي لجياف
مهما علفتيها لا في خير يـتكافو
الغريب رجــع يتعز في لطيافْ
الڨريب في بيتو حجبوه ضــيافو
معادن الناس كثيرة منها كل أصناف
فيها الذهب و اعاج و نحاس و صرْافو
و أنت عقلك معاهم توزن على الأكفاف 👐👐
لي ثڨلو في كفهم عمرهم ما خافْو
ماشو كي الحّلاف كي صاين الاعراف
واش جاب حاكم الأوقاف لقفافو
باسمك يا رحمان تنجو من الأوهاف
نحنا و كل خلاف ملاح اوصافو
محمد رحال
