مختارات القوال في اشعار محمد رحال

🔴#مختارات_الڨوال_في_أشعار_محمد_رحال

مقتطفات من أرجوزة : 🔴#حال_الناس_2

بادي كلامي من لسن فطينْ
أديب الڨول لبيب من العقالْ

اصغو الكلام الكل يا حاضرينْ
يحب الغايب يعاودو لو أمثالْ

تصعب المعاني علاك المساكينْ
لا لحڨو العين شربوه زلالْ

طعم العسل من النحل بنينْ
سم الحنضل مطعمو ڨتتّالْ

ويني الناس بركة و براهينْ
لا ڨعد الحال كيف وقت الحالْ

ريت “المحبة” غير حد العينْ
ريت “الصحبة” تتبنى على المالْ

ريت” العيون” مايحة للزين
ريت” الصبايا” حسبوها فال

ريت “الحرام “شرعوه في دين
ريت “المناكر “في وقتنا حلال

ريت “العداوة” و البغض دفينْ
ريت الرجولة عند الناس قلال

ريت “النسوة” في الرجال تهينْ
ريت” العزوة ” في الناس تسالْ

ريت “الصيد “جيفة مات سمينْ
فسط “الفرايس” يبان غير خيال

ريت” الثعالب “كاتبة مظامين
ريت” المذايب” جامعة الحثوال

ريت ” الزمن “وقت شهر و سنينْ
ليام سراب طريڨ خيالو زال

وين الراجل طبع الرجولة وين ؟؟
دحرو الوقت و زادوه انذالْ

وما دام فيها عاد غير . حينْ
اما” العواتي “اليوم عاشو ذلالْ

ريت ” لودايع” سرقها الأمينْ
خسارة الصابر في صبرو ينالْ

ريت ” المضايع “صابحة فراسين
ريت” الفحولة” سايڨة لبغالْ

ريت ” الڨهد “و لعلوج اثنينْ
كيف “المذايب” خارجة لڨتالْ

ريت” العزارة “خسارة مفاتينْ
شادو” المحافل” هّبطو السروالْ

ريت” الحنانة” في الوقت الشينْ
صبح “الحنين” يتقام بالمالْ

ريت” لصحاب” صبحو مجافينْ
صفيتٌ مازال يصٌفي الغربالْ

واش جاب بومة لطير شاهينْ
معروف الباشڨ حايم جوّالْ

معروف باهي حكيم رزين
يبقى كلامو حافظاتو أجيالْ

شايد خبري في الوطن الزين
جدي عبيد و نقمتي رحالْ

طالب يسعد ڨولو أمين
تالي الدنيا هازة الترحال

هازة الرحيل
وقت يوم نهار عقابو الليل
كل شي فايت لا تكون بخيل
كريم في رزيق ميسور حلال
ما تقدم علي الحق لا بدليل
كل شي ليه وقت يوفى بآجال

أسمع الڨوال ما جايب لمثالْ

بادي كلامي من لسن عريفْ
أديب الڨول شاعر معروفْ

في العالم غني بلا تعريفْ
ترجمت شعري تنشر يطوفْ

عندي فيه النحو و التصريفْ
كنوز اللغة من كل حروفْ

كل وقت يهب صيف خريفْ
ربيع زاهي نجني المقطوف

لانا من الناس تحب التزييفٔ
لانا منهم نخشو فوج الخوفْ

وين ناس الكرم المعاريــفْ
لا ڨعد حب في القلوب تروفْ

ريت “المحبة” من غير وليفْ
ريت “الصحبة “فعلها مكشوفْ

ريت” الحقيقة” حجبها “الزيفْ ”
ريت ” الكذب” ينٌجى الملهوفْ

ريت ” الرجلة” راح منها ” النيفْ ”
ريت ” المكارم ” تحطت رفوفْ

ريت ” الشهامة ” صبحت طيفْ
فاتت خيال فسط الناس وڨوفٍ

ريت ” الكبار ” عايشة مراخيفْ
ريت” الصغار ” حرڨت ألـــوفْ

ريت” النسوة ” تحٍب التكوليفْ
ريت ” الصبايا ” عرضها مكشوفْ

ريت ” العجائز ” صادها التخريفْ
ريت “الشياب ” غّمها المهيوفْ

ريت الحبيب صابح ” الضيفْ ”
ريت الغريب يتهز على كفوفْ

ريت ” الطيب ” حسبوه ضعيفْ
شافوه في رحمة ڨالو معطوفْ

ريت” الدوني ” يهز في التعريفْ
كان عندو المال يفوت الصفوفْ

ريت” الغالي ” من ساس شريفْ
من دون والي ، عايش مطروفْ

ريت ” العروبة ” تخلعت بالسّيفْ
كل يوم🔴 #غريبة و هاك تشوفْ

ريت من كان ، عرضو نظيفْ
صبّح صغير عيشتو مكسوفْ

ريت” الناس ” تجري ملاهيفْ
تلم الدورو تجمع في مصروفْ

ريت العيلة كل حّد ب “كيف ”
ويني عويلة في ماضي ما تشوفْ

ويني عويلة
لمٌة زمان في كل لدار و ليلة
صبحنا بعاد و الڨلوب بخيلة
لڨراب بعدت عمٌك و الخال
الصغار ماحت لعادات دخيلة
تشوف غرايب عجايب لجيال

أسمع الڨوال ما جايب لمثالْ

محمد رحال ✍️